La Chaux-de-Fonds Chapitala culturala svizra 2027 lantscha l’emprim appel per projects
La Chaux-de-Fonds Chapitala culturala svizra 2027 cumenza oz cun in emprim appel per projects per ina retscha da «cartes blanches» (mauns libers) als Anciens Abattoirs, in lieu emblematic e central da l’occurrenza. Quest appel, che sa drizza be ad artist:as ed associaziuns localas, marca l’emprim pass da quest project cultural ambizius. Sper quest program sa preschenta l’agenda da l’occurrenza er tras collavuraziuns cun las instituziuns da la citad, ina programmaziun locala ed internaziunala purtada da La Chaux-de-Fonds Chapitala culturala svizra 2027, sco er cun valurisar tut las propostas culturalas preschentas il 2027 a la Chaux-de-Fonds. L’avertura uffiziala vegn ad avair lieu ils 31 da december 2026, cun ina gronda ceremonia che vegn ad annunziar in onn exuberant e festiv.
Ina cultura instancabla ed averta sin il mund
En 2027 vegn La Chaux-de-Fonds ad esser l’emprima Chapitala culturala svizra che vegn a mussar la ritgezza e la diversitad da sia scena artistica locala. Questa citad-manufactura unica en Svizra, nua che patrimoni ed innovaziun sa cruschan adina puspè, vegn a sa transfurmar durant 12 mais en in lavuratori sut tschiel avert, in spazi d’expérimentaziuns artisticas e da dialogs culturals. Durant tut l’onn vegnan artist:as e public da La Chaux-de-Fonds, da la Svizra e d’utrò envidad:as a s’entupar, barattar e parter enturn in fieu exuberant d’allegrezza culturala. Mintga eveniment, dal pli instituziunal al pli alternativ e DIY, contribuescha a laschar vibrar la citad. In engaschi che va sur ils cunfins da 2027 cun metter enavant ina vita culturala dinamica e ragischada en il temp. Il program maschaida collavuraziuns cun las instituziuns localas, creaziuns sin mesira, grondas celebraziuns popularas ed invits privads per explorar ils lieus zuppads da la citad.
Ils Anciens Abattoirs: in lieu convivial e per scuvrir
Sco perditga da l’istorgia da La Chaux-de-Fonds vegnan il 2027 ils Anciens Abattoirs a daventar in lieu da convergenza, da sentupadas e da creaziun. I vegnan a retschaiver ina programmaziun pluridisciplinara, locala ed internaziunala, sco er spazis convivials per sentupar e far enavant cun las experientschas artisticas. Dapi la stad vegnan ils spazis en il liber er duvrads. Il public po lura scuvrir spectaculs e concerts, baiver in magiel e discurrer davart las experientschas vividas durant l’onn.
L’emprim appel per projects per la scena locala
Il program da La Chaux-de-Fonds Chapitala culturala svizra 2027 vul esser local ed internaziunal, ma igl era impurtant che l’emprim invit sa drizzia ad artist:as ed associaziuns da la regiun.
Quest emprim appel per projects porscha 12 mauns libers, che mintga mais da 2027 vegnan ad animar in spazi different dals Anciens Abattoirs.Ins vegn a resguardar cunzunt la diversitad da profils, roms e praticas per porscher in maletg fidaivel da la ritgezza culturala da La Chaux-de-Fonds.
Pli tard vegn lura lantschà in auter appel per projects, questa giada sin il nivel internaziunal, per motivar creaziuns in situ, stgaffidas en dialog cun il patrimoni e l’ambient da la citad. Entant èn insaquantas collavuraziuns cun las instituziuns culturalas localas gia sin via.
In’avertura festiva gia durant las emprimas secundas da 2027
Per betg perder ina suletta secunda da quest onn spezial vegn la festa a cumenzar gia la saira dals 31 da december 2026 e vegn a cuzzar tut ina gronda fin d’emna d’avertura enfin ils 3 da schaner 2027. Festa gronda en ils Anciens Abattoirs, projects surprendents che vegnan ad emplenir la citad ed a descriver in onn ritg da scuvertas e sentupadas, durant bundant 3 dis vegnin nus a celebrar ensemen l’entschatta da questa gronda aventura.
La Chaux-de-Fonds Chapitala culturala svizra 2027 vegn plaun a plaun a mussar ses concept artistic global, sia programmaziun e sias collavuraziuns durant ils 20 mais che vegnan avant quest eveniment excepziunal.
Contacts
Simone Töndury, directura artistica
simone.toendury@ccs2300.ch / T : 076 506 10 52
Olivier Schinz, directur
olivier.schinz@ccs2300.ch / T : 077 408 42 27
> Communicaziun da pressa, Associaziun La Chaux-de-Fonds Chapitala culturala svizra 2027 (PDF)
