Ils 4 da zercladur 2026 ha gì lieu a Berna la communicaziun uffiziala da la «chapitala culturala svizra 2030».

Grond plaschair: Aarau daventa «Chapitala Culturala Svizra 2030»! Nossas gratulaziuns cordialas.

Aarau, la chapitala dal chantun Argovia, è sa messa tras suenter ina procedura da candidatura da plirs mais cunter ils concurrents Bellinzona, Lugano (ensemen cun Locarno e Mendrisio) e Thun.

La decisiun da la giuria è vegnida communitgada oz uffizialmain a Berna dal president da l’uniun Chapitala Culturala en Svizra, Daniel Rossellat. L’entschatta da zercladur aveva la giuria da 10 persunas da l’uniun CCS valità las annunzias a maun da sis criteris principals ch’èn vegnids valitads differentamain: finamiras, purschida culturala, participaziun culturala, management, finanzas ed experientscha d’organisar occurrenzas grondas. Avant la publicaziun da la victura ha Daniel Rossellat engrazià a tut las citads da candidats, a sias autoritads ed als responsabels dals uffizis da cultura: «Displaschaivlamain po mo ina citad gudagnar, ma tut las citads da candidats èn en in tschert senn victuras da la concurrenza. Il process ha gia chaschunà impurtantas dinamicas en las quatter citads e promovì en spezial la participaziun culturala.»

Suenter l’emprima ediziun da l’onn 2027 a La Chaux-de-Fonds vegn la proxima ediziun ad avair lieu en Svizra tudestga. L’onn 2033 ha la Svizra italofona la preferenza per l’organisaziun da la Chapitala Culturala Svizra.